Узган тәүлектә Казан юлларында 184 юл-транспорт һәлакәте теркәлгән. Алар нәтиҗәсендә алты кеше зыян күргән. Бу хакта шәһәрнең Дәүләт автоинспекциясе хәбәр итә.
Җитди юл һәлакәтләренең берничәсе җәмәгать транспорты катнашында булган.
Яңа Савин районында автобус йөртүчесе кузгалып киткәндә хәрәкәтнең имин булуына инанмаган һәм җәяүлене бәрдергән. Мәскәү районында исә йөртүче гаебе белән трамвайдагы пассажир егылып җәрәхәтләнгән. Совет районында дистанция сакламау сәбәпле килеп чыккан бәрелеш нәтиҗәсендә троллейбус пассажиры зыян күргән.
Моннан тыш, Вахитов районында автомобиль йөртүчесе артка чигенгәндә электровелосипедчыны бәрдергән. Совет районында юлны тиешсез урыннан чыккан җәяүле автомобиль тәгәрмәчләре астына эләккән. Идел буе районында исә дистанция сакламау аркасында ике автомобиль бәрелешкән.