Быел Татарстан Республикасында «Авыл хуҗалыгын үстерү һәм авыл хуҗалыгы продукциясе, чимал һәм азык-төлек базарларын көйләү» дәүләт программасын гамәлгә ашыруга 16,6 млрд сум юнәлтеләчәк. Шуның 4,3 млрд сумы федераль бюджеттан бүленгән. Бу хакта Татарстан Дәүләт Советында республиканың авыл хуҗалыгы һәм азык-төлек министры урынбасары Марсель Мәхмүтов хәбәр итте.

«Гыйнвар аенда авыл хуҗалыгы җитештерүенең финанс-икътисади нәтиҗәләре, нигездә, терлекчелек тармагына бәйле. Акчалата исәпләгәндә, авыл хуҗалыгының тулай продукциясе күләме 20,4 млрд сум тәшкил итте, ә чагыштырма бәяләмәдә җитештерү индексы 102,2% булды», – диде ул парламентның Экология, табигатьне файдалану, агросәнәгать һәм азык-төлек сәясәте комитеты утырышында. Бу турыда «Татар-информ» яза.

Мәхмүтов аңлатканча, уңай динамика ит җитештерү күләменең якынча 2%ка, ә сөт җитештерүнең 5%ка артуы белән тәэмин ителгән. Бу күрсәткечләр 2025 елның шул ук ае белән чагыштырыла. Узган ел республикада 524 мең тонна ит, 2,3 млн тоннадан артык сөт һәм 1,6 млрд данә йомырка җитештерелгән.

«Соңгы елларда сөт җитештерүдәге үсеш технологияләрне камилләштерү һәм заманча сөтчелек комплексларын эшләтеп җибәрү нәтиҗәсендә тәэмин ителде. Узган ел гына да 11,3 мең баш сыерга исәпләнгән 18 объект файдалануга тапшырылды», – дип билгеләп үтте ул.