Қазақстанда техникалық мамандарға сұраныс артып келеді. Қазірдің өзінде шамамен 900 мың маман жетіспейді, деп хабарлайды LS.

Сенат төрағасы Мәулен Әшімбаевтың айтуынша, елде білікті кадрлардың айтарлықтай тапшылығы байқалады.

"Инженерлер, техникалық мамандар, агрономдар , ветеринарлар және басқа да мамандықтар ерекше сұранысқа ие. Болашақта бұл қажеттілік одан әрі арта түседі. Еңбек ресурстарын дамыту орталығының болжамына сәйкес, 2030 жылға дейін ел экономикасына қосымша 1,6 млн маман қажет болады. Қазіргі таңда Қазақстанға орта техникалық білімі бар 900 мыңға жуық маман керек, ал жоғары оқу орындарының түлектеріне деген сұраныс 430 мың адамды құрайды", – деді ол.

Оның айтуынша, қазіргі уақытта құрылыс, ауыл шаруашылығы, өңдеу өнеркәсібі және көлік салаларында мамандарға деген сұраныс жоғары.

"Осы орайда заңнаманың сақталуын қатаң бақылау және жұмыс берушілердің жауапкершілігін күшейту маңызды. Біз бұл бағытта бизнес, еңбек инспекциясы және өнеркәсіптік қауіпсіздік органдары белсенді әрекет етуі тиіс деп есептейміз. Өкінішке қарай, ел кәсіпорындарында жарақат алу мен өлім-жітім деңгейі әлі де жоғары. Жуырда Ұлытау облысындағы Жомарт кенішінде орын алған қайғылы оқиға соның айқын дәлелі", – деді М. Әшімбаев.

Оның мәліметінше, 2021-2023 жылдар аралығында елде өндірістік жазатайым оқиғалар саны айтарлықтай өскен. Олардың 80%-дан астамы ірі және орта кәсіпорындарда болған. Барлық төтенше жағдайлардың 44%-ы Қарағанды, Шығыс Қазақстан және Ұлытау облыстарына тиесілі.

Премьер-министрдің орынбасары Ермек Көшербаевтың айтуынша, экономикада 2,4 млн адам жұмысшы мамандықтары бойынша еңбек етеді.

Соңғы 10 жылда техникалық және кәсіптік білім алған қызметкерлердің үлесі жұмыспен қамтылған халықтың жалпы санының 49%-ына жетті, өсім 17%-ды құрады. Ең көп мұндай мамандар сауда саласында – 856 мың адам немесе шамамен 61%, өнеркәсіпте – 675 мың адам, бұл 63%-ды құрайды. Ауыл шаруашылығында – 559 мың, көлік саласында – 419 мың адам жұмыс істейді.

Жұмысшы мамандықтары арасында ең жоғары жалақы өнеркәсіп саласында- 588 мың теңге, қаржы саласында – 531 мың теңге, ал көлік саласында – 403 мың теңге деңгейінде белгіленген.

"Болжамға сәйкес, 2030 жылға қарай еңбек нарығына 1,8 млн-нан астам жас қазақстандық қосылады. Алдағы алты жыл ішінде жұмыс күшіне сұраныс 1,6 млн адамды құрайды, оның жартысынан көбі кәсіптік-техникалық білім алған мамандар болады. Соның ішінде 400 мыңға жуығы – жұмысшы мамандықтарының өкілдері. Қазіргі таңда ең қажет 100 жұмысшы мамандығы анықталған. Ең үлкен сұраныс құрылыс, ауыл шаруашылығы, өңдеу өнеркәсібі және денсаулық сақтау салаларында болжанып отыр, бұл жалпы еңбек нарығының 56%-ын құрайды", – деп атап өтті Е. Қошербаев.

Құрылыс саласында ең көп сұранысқа ие мамандықтар: сылақшылар – 9,7 мың адам, прорабтар – 9,4 мың адам, дәнекерлеушілер – 7,2 мың адам.

Ауыл шаруашылығында фермерлер тапшылығы – 10,6 мың адам, тракторшылар – 7,1 мың адам. Өңдеу өнеркәсібінде дәнекерлеушілер, тігіншілер, киім реставраторлары, өндірістік жабдық слесарлары, сантехниктер мен құбыр монтаждаушылар қажет. Денсаулық сақтау саласында орта медициналық персонал – 24,6 мың адам, жедел жәрдем жүргізушілері – 4,6 мың адам, фельдшерлер – 4,5 мың адам қажет.

Жұмысшы мамандықтарына деген ең жоғары сұраныс Қарағанды, Түркістан, Жамбыл және Алматы облыстарында болады. Бұл өңірлер жалпы сұраныстың 29%-ын құрайды.

Еңбек және халықты әлеуметтік қорғау министрі Светлана Жақыпова сенаторлардың сұрақтарына жауап бере отырып, жасанды интеллекттің еңбек нарығына әсері туралы айтты.

"Зерттеу нәтижелері бойынша, шамамен 29% функция өзектілігін жоғалтады. Сонымен бірге, жұмысшы мамандықтарының қысқаруы 13%-ды құрайды, әсіресе медицина, ақпараттық-коммуникациялық технологиялар (АКТ) және қаржы салаларында", – деп түйіндеді ол.

Бұған дейін, Қазақстанда жұмысшылар үшін арнайы жеңілдетілген ипотека іске қосылатыны хабарланған болатын. Сондай-ақ, елде құрылыс саласында кадр тапшылығының күрт артуы болжанған еді.