«Татар хатын-кызлары» комикслар китабы ЮНЕСКОның дөньяның җирле халыклары телләрендә балалар һәм үсмерләр өчен атаклы китаплар коллекциясенә кертелгән. «Бу безнең өчен – кечкенә генә гаилә нәшрияты өчен супер хәбәр», дип язган проектның җитәкчесе, татарча комикслар чыгару белән шөгыльләнүче «Абага чәчәге» нәшрияты җитәкчесе Регина Гаязова.

Комикслар өчен сценарийларны журналист, музыкант Рәдиф Кашапов язган. Рәсемнәрне Наталья Якунина, Юлия Галиәкбәрова, Руслан Ибраһимов, Арина Филиппова, тышлыгын Соня Лигостаев ясаган.

Җыентыкка күренекле татар хатын-кызлары турында дүрт тарих кертелгән. Болар – беренче татар актрисасы Сәхибҗамал Гыйззәтуллина-Волжская, композитор Сара Садыйкова, Советлар Союзы Герое, очучы Мәгубә Сыртланова, математика профессоры Сара Шакулова.

«Татарча комикслар» проекты кысаларында 3 җыентык, 2 кечкенә китап басылып чыккан. Рәдиф Кашапов әйтүенчә, хәзер команда Тукай турында китап чыгару эшен башлаган.

• ЮНЕСКО кураторлыгындагы халыкара коллекциягә (IBBY) 150 телдә 170кә якын китап кергән. Алар 500ләп заявка арасыннан сайлап алынган.