102 яшьлек Нәфисә апаны Җиңү көне белән котладылар 2026-05-12 21:48:24
Районда гасыр чиген узган өлкәннәребез булуы сөендерә. Аларның гомер юлы авыр булса да, тырышлыкларын, фидакарь хезмәтләрен һәркемгә үрнәк итеп куярлык. Бүгенге көндә якыннарыннан хөрмәт күреп яшәүләре — үзе бәхет-куаныч.
Район, республика җитәкчеләре дә йөзьяшәрләрнең хәлләрен даими белешеп торалар, яннарына баралар, бәйрәмнәрдә аеруча хөрмәтлиләр.
Бөек Җиңү көне алдыннан район башлыгы Фәрит Хөснуллин, барып, шәхсән үзе тәбрикләде аларны.
8 май көнне, районга эшлекле сәфәре кысаларында, Татарстан Республикасында Суд департаменты идарәсе җитәкчесе Җәүдәт Салихов та ветераннарыбыз белән очрашты.
Район башлыгы белән бергә алар Урта Кәшер авылында яшәүче 102 яшьлек Нәфисә апа Насыйбуллина янында булдылар, бәйрәм күчтәнәчләре тапшырдылар, Бөек Җиңүне яулашканы өчен рәхмәт әйттеләр, изге теләкләрен җиткерделәр.
