Михаил Александрович Олы Аты егете, ә Галина Петровна Зәй районы Туңылҗа авылында туган. 1984 елдан Түбән Кама шәһәрендә яшиләр. Ике кыз тәрбияләп үстергәннәр. Бүгенге көндә алар бәхетле әби белән бабай, дүрт оныклары бар.

Авылда туып үскән Булановларны табигать баребер үзенә тарткан күрәсең, шунлыктан алар Олы Аты авылында өй салалар. Җәй көннәрен бакчаларында рәхәтләнеп яшелчә, җиләк-җимеш үстереп үткәрәләр. Михаил Александрович әле эшли, ә менә Галина Петровна инде лаеклы ялда.

Тик шулай да ялда булуына карамастан, Галина Петровна шәһәрдә дә бер дә тик утырмый. Ул «Баш чишмә» гаилә ансамбле солисткасы. Шәһәрдә, районда оештырылган бик күп чараларда да актив катнаша. Ә иң мөһиме, ул үзенең оныкларына йола-гадәтләребезне, җыр-биюләребезне өйрәтә. Хәзергесе көндә оныклары Валерия, Анастасия һәм Кирилл Түбән Каманың «Җиз кыңгырау» яшьләр ансамблена йөриләр һәм республика күләм конкурсларда җиңүләр яулыйлар.

Гаиләләрендә бик матур гадәт тә бар аларның: бәйрәмнәргә әзерләнгәндә барсы бергә җыелып, керәшен җырулары җырлап, пилмән ясыйлар.

Галина Петровна кечкенә вакытта әнисе аңа курчакларны үзе ясый торган була. Шул вакытларны искә төшереп, хәзер ул үзе дә тукымадан искиткеч матур курчаклар тегә. Курчаклар гына дип әйтү аз булыр, чөнки аның эшләре тулы бер композиция.

Галина Петровна һәм Михаил Александрович кебек матур, тырыш, сокланып үрнәк алырлык гаиләләребез булганда керәшеннәрнең йола-гадәтләре яшәячәк.

Ольга Афонова

Алиса Ахметшина фотосы.