Белгеч билгеләп үткәнчә, мошенникларның сөйләме билгеле бер “сюжет”ка корылып, кешене тәнкыйть күзлегеннән фикерләүдән ваз кичтерүгә юнәлдерелгән. Алар еш кына, уйларга вакыт калдырмас өчен. бик тиз сөйли яки, киресенчә, ышандыру өчен гипнозга тартым тыныч тонда сөйләшә.

Психолог әйтүенчә, шалтыратучы “банк хезмәткәре” яки “полиция хезмәткәре”, чынбарлыктагы “коллегаларыннан” аермалы буларак, эшлекле тонда түгел, бәлки кешенең хәленә кергәндәй, кызгангандай булып, төчеләнеп сөйләшә. Җөмләнең яртысын өзеп, вакыт бик тар булган кебек хис тудыра, берара дәшмичә торып басым ясый.

Шпагина сүзләренә караганда, социаль инженериядә билгеле бер сөйләм ысуллары бар. Болар – кешене аралашудан тыю, ашыгычлылык хисе тудыру, профессиональ терминология кулланып, бик үз итеп кылану. Белгеч, шалтыратучыга шик төшкән очракта, шундук сөйләшүне туктатып, сайтта күрсәтелгән телефон аша оешмага мөстәкыйль шалтыратырга киңәш иткән.

Исегезгә төшерәбез: Татарстан буенча Эчке эшләр министрлыгы мәгълүматларына караганда, мошенниклар быел беренче ике айда республикада яшәүчеләрнең 740 миллион сум акчасын урлаган.