Қазақстанда алтын мен мысқа перспективалы учаскелерді анықтау жұмыстары жүргізілуде. Бұл туралы өнеркәсіп және құрылыс министрлігі LS редакциясының сауалына берген жауабында хабарлады.

Министрліктің мәліметінше, қазақстандық және түрік компаниялары бірлескен кәсіпорын құруды жоспарлап отыр. 2023 жылы тараптар ынтымақтастық шарттарын келісіп, қазақстандық компания шетелдік серіктесіне перспективалы учаскелерді іздеп ұсынуды бастаған.

Түрік тарапы геологиялық барлау жұмыстарын қатты пайдалы қазбалар табылып, қорлар мемлекеттік балансқа қойылғанға дейін толық қаржыландырады.

"Қазіргі уақытта тараптар лицензия алу үшін ең перспективалы учаскелерді бірлесіп іздестіру және таңдау жұмыстарын жүргізуде", – деп хабарлады министрлікте.

Министрліктің мәліметінше, Түркия инвесторы алтын мен мыс кен орындарына ерекше қызығушылық танытып отыр. Түрік компаниясына қарастыру үшін бірнеше учаске ұсынылған.

Айта кетейік, бұған дейін министрлік соңғы 30 жылда Қазақстанда темір, марганец, алтын, уран, мұнай және газ қорларының артқаны туралы мәлімдеген болатын. Мыс бойынша қолданыстағы өндіру көлемін ескергенде, қорлар 40 жылдан астам уақытқа жетеді. Бүгінде жер қойнауын пайдаланушылар мысқа перспективалы учаскелерде белсенді барлау жұмыстарын жүргізіп жатыр. Жалпы, еліміздің минералды-шикізат базасы 987 қатты пайдалы қазба кен орнын қамтиды.